Peb ntseeg tias Vajtswv txoj lus  66 phau yog Vajtswv Yawmsaub txoj lus qhia kom noob neej nrhiav tau paub txog “TXOJ KEV, QHOV TSEEB, thiab TXOJ SIA”.   Qhia kom noob neej paub tias lub ntiajteb no chivkeeb huam yuaj tshwm sim los li cas, tam sim no peb nyob rau tiam twg lawm, thiab lub ntiajteb no yuav xaus mus li cas.  Qhia txog txoj kev cawm dim, peb yuav ua cas thiaj kovyeej txoj kev tuag mus tau txoj sia ntev dhawv mus ib txhim. Nws yog lub teev luj, rab pas ntsuas thiab sim neeg ntiajteb txhua leej tes num.  Phau ntawv Vajtswv txoj lus no Vajtswvntuj Yawmsaub tus Ntsujplig yog tus tshoov kom Nws cov tub txib sau tseg cia ib tiam dhau ib tiam.  Cov tub txib sau muaj coob tshaj 40 leej.  Lub caij sau phau ntawv “CHIVKEEB”  uas yog thawj phau mus txog rau phau “TSHWMSIM” uas yog phau kawg tom qab nrug deb txog 1600 xyoo.  Txawm ntev npaum li ntawm los cov lus thaum pib mus txog rau thaum xaus tsis muaj kev cov nyom. Vim yog Vajtswvntuj Yawmsaub tib tug Ntsujplig yog tus tshoov kom lawv sawv daws sau ib tiam dhau ib tiam, suav thaum pib mus txog thaum xaus.  Yog koj nyeem Nws txoj lus,  cov lus ntawm yuav ua lub teeb ci, taws rau koj pom kev.  Vajtswvntuj Yawmsaub Txoj Lus yog cov zaub mov yug fab ntsujplig, koj yuav tsis tshaib nqis. Koj yuav saib txoj kev lom zem hauv ntiajteb no tsis muaj nuj nqes, zoo yam lub neej caum cua xwb. Rau txhua tus uas rau siab nyeem:  siab luv yuav hloov muaj lub siab ntev,  siab phem yuav hloov muaj lub siab zoo, siab xam khib yuav hloov muaj lub siab tsis khuv xim zog, siab dag yuav hloov muaj lub siab tseeb, siab nyiam taug xaiv yuav tswj tau nws tus kheej, siab ruam yuav txawj ntse tuaj, siab hlob yuav txawj txaus, tub sab yuav txawj tseg, lub neej ntiajteb tsuas yog ib vuag dua. Koj puas yuav nyeem Vajtswvntuj Yawmsaub txoj lus uas cawm neeg txoj sia kom ntau tshaj no thiab?

Vajtswv txoj lus yog Vajtswvntuj Yawmsaub cov lus qhia rau neeg ntiajteb kom paub txog Nws lub siab nyiam thiab txoj kev cawm dim.

Vajtswvntuj Yawmsaub yog tus tshoov Nws cov tubtxib sau Vajtswv txoj lus. Neeg ntiajteb yuav rho, yuav ntxiv tsis tau rau Nws cov lus tseem ceeb ntawm.

Lus thov Vajtswj: Kuv yuav nyeem, tshawb, kawm phau Vajtswv txoj lus, yuav ua rau kuv pom kev ua neej, thiab ua tau neeg zoo.  Npaj txhij mus nyob lub ntuj tshiab teb tshiab.

Peb ntseeg tias muaj ib tug Vajtswvntuj Yawmsaub xwb, uas yog Vajleejtxiv, Vajleejtub, thiab Vajntsujplig koom ua tib tug Vajtswv Yawmsaub. Nws yeej nyob ib txwm los, tsis muaj paus, tsis muaj ntsis, tsis txawj tuag tsis txawj yug, paub txhua yam yuav tshwm sim los tomntej, yog tus pib thiab xaus, nyob txhua qhov chaw.  Muaj hwjchim loj ntshaj tag nrho txhua yam huv tib si.  Yog Nws nqes tes ua lawm tsis muaj neeg txwv tau, yog Nws txwv lawm tsis muaj neeg ua tau.  Tsis muaj ab tsi uas Nws yuav tsis paub txog, tsis hais saud nruab ntug, los hauv lub ntiajteb no, thiab paub tias hauv koj lub siab tab tom xav txog ab tsi.  Nws yog tus tsim thiab tswj txhua yam tsis hais yam nyob saud nruab ntuj, los hauv lub ntiajteb no, yam qhov muag pom thiab tsis pom huv tibsi, Yog tus tsa thiab txo tej  huabtais, tej nom tswv hauv ntiajteb no.   Koj puas txais yuav Vajtswvntuj Yawmsaub los ua koj tus Tswv?

Muaj tib tug Vajtwv Yawmsaub xwb.  Uas Vajleejtxiv, Vajleejtub, thiab Vajntsujplig koom ua ib tug xwb.